香港朱古力推介｜召集朱古力控！開飯仔發掘咗5間香港人氣必試朱古力，有齊特濃單品朱古力、可可咖啡、手工朱古力甜品、朱古力主題雞尾酒Cocktail等選擇，帶你試勻全港最正朱古力！無論係追求極致濃度嘅忠實朱古力迷，定係入門級朱古力Fans，都可以跟住呢個朱古力推介懶人包，搵出最啱自己心水嘅朱古力愛店～
1. 中環精品朱古力Cafe - Goose' Chocolate
呢間出品有機會係全港最濃嘅朱古力！佢哋嘅單品朱古力飲品只用黑朱古力加水炮製，唔額外加糖、奶或者忌廉，帶出朱古力最原始嘅風味，質感更濃厚細膩～大家可以按個人喜好揀Balanced、醇厚、Fruity款式嘅朱古力，更可挑戰最濃嘅100%純可可！鍾意Refresh口味？可以試吓薄荷朱古力特飲，凍飲更清爽～
75%秘魯單品朱古力(左)｜薄荷朱古力特飲(右)
幾乎每枱客人都有order小店嘅招牌雙重朱古力布甸，面層加咗可可碎點綴，厚滑濃醇令人食唔停口！朱古力布甸有機會提早賣晒，唔想撲空就記得早啲去排隊試喇～甜品方面其實仲有雪葩，例牌必試80%黑朱古力味，估唔到仲有坊間少見嘅可可果肉味，加上香檸檬帶出酸甜風味，味道有啲似山竹，幾清新！
招牌雙重朱古力布甸(左) (圖：yumme_agnes)｜80%黑朱古力&可可果肉雪葩(右)
Goose' Chocolate
📝 開飯仔筆記
📍 地址：上環太平山街16號地舖
🍫 朱古力款式：單品朱古力飲品、薄荷朱古力特飲、雙重朱古力布甸、黑朱古力雪葩
🔥 推介：S.O.Pure Chocolate、Double Chocolate Pudding
✅ 小貼士
1️⃣ Cafe逢星期一、二休息
2️⃣ 朱古力布甸有機會提早賣晒，建議預早時間到
2. 銅鑼灣朱古力咖啡主題Cafe - Ramie
小店由西貢咖啡名店Hushush店主同友人拍住上一齊經營，主打意式古法朱古力咖啡，靈感嚟自店主喺意大利試過嘅可可咖啡，店主加以改良，以自家烘焙咖啡豆沖成Espresso，配豐盈朱古力同奶泡，飲落微苦濃滑，面層仲灑咗朱古力爆炸糖，令口感更豐富！
第一次到訪的朋友必試Espresso + Chocolate - Bicerin
Cafe招牌單品朱古力都係人氣之選，用上世界各地嘅可可豆，直接將朱古力融成濃稠嘢飲，真材實料！朱古力飲品沿用法式巴黎風做法，飲落更Rich，除咗以牛奶為基底沖泡外，大家亦可以轉配豆奶～店舖仲有幾款精緻手工甜品，特別推介Tartufo Tart，微甜嘅非洲單品朱古力包住開心果忌廉同黑莓醬，底層仲有Nutty朱古力餅，多重層次～
單品朱古力飲品(左)｜自家製Tartufo Tart(右)
Ramie
📝 開飯仔筆記
📍 地址：銅鑼灣告士打道275號海都大廈地下11號舖
🍫 朱古力款式：朱古力咖啡、單品朱古力飲品、意式Tartufo Tart
🔥 推介：Espresso + Chocolate - Bicerin、Drinking Chocolate
3. 主打髒髒朱古力Cafe - sensory ZERO
呢個本地精品咖啡品牌喺港九新界都有分店，以衝擊視覺嘅髒髒朱古力打響名堂！招牌「痴＿線朱古力」刨滿3款朱古力，有齊牛奶朱古力、黑朱古力、白朱古力，再灑滿可可粉，超浮誇嘅賣相啱晒相機食先，打卡滿分～Cafe仲有香滑朱古力牛奶，講究用上法國Valrhona朱古力沖泡㗎！兩款朱古力都好啱朱古力BB班嘅朋友，朱古力同奶香平衡，甜甜哋唔怕太苦～
招牌「痴＿線朱古力」(左)｜法國Valrhona朱古力牛奶(右)
sensory ZERO
📝 開飯仔筆記
📍 地址：全線分店地址 (按此)
🍫 朱古力款式：髒髒朱古力、髒髒朱古力咖啡、法國Valrhona朱古力牛奶
🔥 推介：痴＿線朱古力
4. Venchi朱古力主題酒吧 - Cremino Bar
意大利朱古力品牌Venchi同上榜Asia’s 50 Best Bars 2025嘅中環創意雞尾酒吧The Savory Project破天荒合作，打造全港首間期間限定嘅Pop-up Cremino Bar，為大家帶嚟5款期間限定嘅Creminotail特調雞尾酒！Cocktails靈感嚟自Venchi嘅經典Cremino朱古力系列，有開心果黑朱古力、榛子朱古力、黃金焦糖杏仁朱古力、特濃黑朱古力等口味，交織香醇可可風味同酒香～Pop-up Cremino Bar快閃為期一個月，大家快把握機會Chill住嘆各款特色朱古力主題Cocktails喇！
5款全新Creminotail特調雞尾酒，配搭相對應的Venchi Cremino朱古力
Pop-up Cremino Bar
📝 開飯仔筆記
📍 地址：中環蘇豪士丹頓街4號地舖 (4月1日開幕)
📅 期間限定：4月快閃限定
🍫 朱古力款式：5款全新Creminotail特調雞尾酒
🔥 推介：Pistachio Fiz、Cremino Martini
✅ 小貼士
1️⃣凡於指定Venchi門市消費滿HK$2,000或以上(當中包含Cremino系列朱古力商品)，即可獲贈「The Cremino Trio - 味覺篇」Drink Pass乙張，可於4月2日至4月17日期間於The Savory Project酒吧免費享用指定Creminotail乙杯及相應的Cremino朱古力(數量有限，送完即止)
5. 銅鑼灣朝啡夕酒朱古力Cafe - Brisa
呢間精品可可主題Cafe喺銅鑼灣新開張無耐已大受歡迎，Cafe同本地人氣朱古力品牌Conspiracy Chocolate合作，為大家帶嚟Bean-to-Bar嘅朱古力體驗～除咗香濃可可特飲、可可茶外，亦有可可Cappuccino、Nitro Cold Brew等咖啡選擇，配返件流心朱古力曲奇或者朱古力Brownie真係大滿足～打卡必試「唔會融嘅雪糕」，其實係香滑黑朱古力慕絲，仲可以升級搭配可可碎、即刨100%朱古力、榛子等配料。
必試招牌熱可可，配流心朱古力曲奇一流
入夜後Cafe就變身做酒吧，大家可以睇心情DIY任選Cocktail口味，每杯都係獨一無二。如果怕酒味太重，偏好易入口款式，咁就可以試吓士多啤梨朱古力雞尾酒，好似甜品版Cocktail咁！最估唔到係雞尾酒有牛肉、芫荽等風味揀，各款組合令人意想不到。咖喱味Cocktail真心唔伏，幾好飲㗎～自由Mix & Match嘅選擇令大家每次嚟飲都可以有新驚喜！
Cocktails可自選風味組合
Brisa
📝 開飯仔筆記
📍 地址：銅鑼灣希慎道33號利園一期3樓301A號舖
🍫 朱古力款式：可可飲品、朱古力Cappuccino、可可茶、朱古力慕絲甜品、朱古力榛子曲奇
🔥 推介：Hot Cacao (Classic)、Dark 75% Whipped Chocolate
更多OpenRice詳細推介：
►【2026米芝蓮】香港及澳門必比登推介 新上榜餐廳指南 (按此)
► 2026斑蘭甜品｜限定泰國過江龍 街坊小店集合! 千層糕/戚風蛋糕/泰式斑蘭甜糕 (按此)
► 2026新開麵包店｜4大必食：沖繩海鹽卷/龍蝦牛角脆筒/茉莉花奶油冬甩/山葵明太子鹽可頌(按此)
文：Kylie
相：Tom、Tony
