近期麵控要試嘅過江龍，必定係呢兩間人龍店！一間有「船麵界王者」稱號，一間就係屢次得獎嘅東京拉麵店，即睇佢哋有咩特別之處啦～
1. 最新過江龍麵食：船麵界王者
呢間船麵界王者之前未開業已經引起熱話，能夠吸引大家，以下幾個條件功不可沒：
1) 招牌湯底熬足8個鐘，味道夠濃郁，想滿足啲可以免費追加濃湯～
2) 一碗有齊超高質配料，包括澳洲和牛牛腿肉片、牛筋、金錢展、牛肉丸，仲可以自己揀內臟同辣度組合，比平時嘅船麵用料高質之餘更有彈性，其中招牌和牛肉片船麵就最受歡迎。
3) 保留傳統供應拌麵款式，辣度跟足當地口味仲有2個level (亦有走辣口味)，配豬骨清湯同彈牙嘅蛋麵就最夾。
4) 餐廳敢於創新，好似香港限定嘅鑊氣炒粉麵飯就推介「泰式打拋牛肉碎牛筋伴飯及煎蛋」，惹味之餘仲有蛋黃汁撈飯！
Thong Smith
📒 開飯仔筆記
📍 地區：灣仔
🍜 類型：泰國菜 / 粉麵 / 串燒
💰 人均：$101-200
🏆 必試：招牌和牛肉片船麵 / 泰式打拋牛肉碎牛筋伴飯及煎蛋 / 蒸麵包伴暖吉士醬(甜品)
圖：餐廳(IG)
2. 最新過江龍麵食：東京得獎拉麵
全球首間海外分店落戶香港！餐廳長期位列日本Tabelog榜首，被譽為「東京三大拉麵名店」之一，由嚟自東京嘅創辦人兼主廚盛島博志先生主理。香港店引入靈魂湯底、帶小麥香嘅麵條之外，仲有一系列本地限定小食！
1) 試業期間：屢獲殊榮嘅「淡麗系醬油拉麵」由盛島先生親自監修，每日限量供應180碗，其後再作調整。
2) 招牌秘製淡麗系湯底：每日新鮮熬煮，以近30種食材悉心炮製，包括日本國產雞、干貝、蜆、熟成鰹節、鯛魚頭等高級魚介，再加頂級吞拿魚花等6款日本進口魚乾熬煮，鮮味平衡得好好。湯底最後會調成醬油味、鹽味同白醬油味。
3) 叉燒款式：4款拉麵之中分別包含5款唔同製法+厚度嘅叉燒，例如慢火燉煮4至6小時嘅「燉煮豚肩叉燒」係豚上肩部位，帶點油香；而「燒豚腩」就用高湯燉煮4小時再炙燒，淡淡炭火香令味道更有層次。而豚肉以外仲有「慢煮雞叉燒」可以揀，提供更多選擇。
4) 香港限定飯類+小食：月見叉燒丼、南蠻炸雞丼、以頂級食材製作嘅白松露油月見拌飯
拉麵屋 嶋
📒 開飯仔筆記
📍 地區：銅鑼灣
🍜 類型：日本菜 / 拉麵
💰 人均：$101-200
🏆 必試：手製雲吞拉麵 (海老雲吞+豚肉雲吞) / 叉燒拉麵 (慢煮豚叉燒+燉煮豚肩叉燒+慢煮雞叉燒) / 招牌特上拉麵 (燒豚腩+慢煮雞叉燒+慢煮豚叉燒+燉煮豚肩叉燒+海老雲吞) / 極上味玉拉麵 (燒豚腩+慢煮雞叉燒+慢煮豚叉燒+燉煮豚肩叉燒+煙燻叉燒+味玉+海老雲吞+豚肉雲吞)
更多OpenRice詳細推介：
► 香港藝術三月美食推介｜Art Basel+中環/西九餐廳清單：藝術下午茶、沉浸式晚餐一次睇 (按此)
► 五星酒店Hotel ICON自助餐最新必食推介！鐵板燒藍龍蝦/阿拉斯加帝王蟹/火焰膏蟹 (按此)
► 香港刀削麵推介｜4間人氣小店：牛腩麵/麻辣麵/炒刀削麵都有 (按此)
文：Cathy
採：Renee、Kylie
攝：Tony
片：Tom、Tony
編：Kate
