當日六點準時到達，酒店安排咗對窗嘅位置，本來心情大好，點知隔離枱有位小朋友成晚喊唔停。正當我哋有啲頭痛之際，職員好細心咁主動走過嚟，話可以幫我哋調去其他座位，仲好有禮咁解釋唔好意思。呢份貼心，真係即刻加分。
講到食物，絕對係呢度嘅亮點。海鮮區有長腳蟹、翡翠螺、帶子、三文魚、吞拿魚，樣樣都新鮮到不得了，食得出係靚貨。而且每一款都處理得啱啱好，唔使點調味已經好鮮甜。最驚喜係牛舌，真係必食之選 : 入口軟腍得嚟帶點彈牙，個種香濃同油脂感。整體食物質素非常高，完全唔使懷疑。
服務方面，絕對係五星級酒店水準，由帶位到收碟，每個細節都做得好到位。最窩心係知道我哋嚟慶祝結婚週年，枱上擺咗個慶祝牌仔，期間職員仲不時過嚟問需唔需要幫我哋影相，語氣真誠又自然，唔係公式化嗰種，令成晚感覺特別溫馨。
如果你都係追求環境靜謐、食物精緻、服務周到嘅用餐體驗，露台餐廳絕對值得一試。呢一餐，為我哋嘅週年纪念添上完美一筆。
