平時想搵個地方舒舒服服飲杯酒、食餐好? 旺角呢間「J.moon」完全係世一選擇！呢度除咗有駐場調酒師(佢哋最出名係12杯夢幻星座雞尾酒)，仲請嚟酒店級大廚坐鎮，完全超越一般酒吧小食嘅Level，嚟到飲住酒食蟹膏北海道帶子蘆筍意大利飯、左口魚裙邊櫻花蝦三文魚籽煲仔飯、照燒左口魚裙邊三文魚 Maki Taco等，真心Chill呀。
【左口魚邊櫻花蝦三文魚籽煲仔飯】
近期人氣爆紅嘅左口魚邊煲仔飯，「J.moon」都有得食!! 左口魚邊依然勁有魚油香，上面仲鋪滿櫻花蝦同粒粒卜開嘅魚籽，撈勻一齊食真係好有層次，食到底仲有飯焦。
【蟹膏北海道帶子蘆筍意大利飯】
一上枱已經聞到好濃郁嘅蟹膏香味，意大利飯仲吸晒蟹膏精華幾鮮甜。好鍾意佢嘅北海道帶子，煎到金黃色有啲外脆內軟口感。
【大蝦及三文魚子海膽醬意粉】
如果你係海膽醬Fans，揀呢道掛汁力強海膽醬意粉就啱晒喇 ！一咬落去係好Creamy嘅鹹甜海膽味道，再食件大蝦平衡膩感啱啱好。
【明太子大蝦牛油果Maki Taco / 照燒左口魚邊三文魚 Maki Taco】
超得意嘅日式Taco！炸到脆卜卜紫菜夾住壽司飯，兩種口感加埋一齊又幾上癮。個人幾鍾意明太子大蝦配牛油果，明太子醬勁多!! 另一款就有照燒左口魚邊配三文魚，火力將左口魚邊同三文魚逼出魚油，飲埋Cocktail啱晒呀。
【蜜糖芥末三文魚Pizza / J.moon 招牌手工薄餅Pizza】
點估到有間酒吧嘅手工薄餅咁出名，「J.moon」係會有熟客為咗佢哋嘅手工薄餅返嚟。手工薄餅焗到微焦鬆脆，特別係薄餅邊位會有啲煙韌口感𠻹。
蜜糖芥末三文魚口味有蜜糖芥末+Cream Cheese真係無得輸。J.moon招牌口味就有齊Parma Ham、沙樂美腸同溫泉蛋，一切開啲蛋汁流晒出嚟，鹹香又軟滑好吸引。
【自家製蝦多士配韓式甜辣醬】
平時飲酒仲講緊食花生、薯片!? 起碼都食件蝦多士先夠脆口呀😎。蝦多士真係有原隻大蝦，下層多士係炸到酥脆，加埋韓式甜辣醬飲啤酒一流。
【蒜香參巴醬炒蜆配酸種麵包】
其實參巴醬嗰種辣得嚟惹味唔嗆口嘅風味，真係好啱飲酒。「J.moon」大廚就將參巴醬炒大蜆，直接用手拎起食，啜埋蜆殼嘅汁真係好吸引!! 另外跟配嘅酸種麵包都幾搶Fo，烘到脆卜卜，最後用嚟吸埋碟上嘅精華辣汁啦。
【避風塘粟米條配冬蔭功醬】
經典酒吧小食—避風塘粟米條都幾出色。脆炸粟米條脆得嚟唔會太乾身，上面再灑滿港式避風塘蒜碎同辣椒。食嗰陣蘸埋泰式冬蔭功醬，酸、辣、鹹、香，唔覺唔覺就清碟喇。
【靚靚雞尾酒！】
「J.moon」駐場調酒師成日會推出各款雞尾酒，喺旺角想搵個地方坐吓Chill吓就啱喇。
Taurus
“Make yourself at home, this drink will definitely make
you feel like home with all your passion surrounding by you”
調酒師希望你可以喺呢杯雞尾酒沉澱於溫暖感覺，將烏龍茶浸泡威士忌、百香果，配合橙利口酒、檸檬汁、雲呢拿糖漿、忌廉撞出層次。
Scorpio
“You're a drifting wood drifting on a river with no destination but freedom, maybe you'll know where to go by taking another sip”
感受自由漂流嘅詩意～ 以橙皮浸泡Gin酒，加入橙糖漿、苦味開胃酒，帶嚟清新果香同微苦嘅層次感，好似漂浮於河流中尋找去向。
Libra
“This is perfectly balanced. Just like you”
體驗完美平衡嘅味蕾之旅～ 以散發香氣嘅香蕉葉浸泡Rum 酒，同時加入白可可嘅細膩甜味、牛油果嘅奶油質感同豆奶，再以班蘭泡沫增添輕盈花香，每一啖都好豐富。
J.moon
地址: 旺角西洋菜南街1A-1K號百寶利商業中心4樓10-11號舖
電話: 95455738