喺香港都想有日本Vibe，好似日本人咁放工去居酒屋飲杯酒、食串燒同朋友Chit-chat吓，尖沙咀就有呢間燒鳥專門店「火赤Akai Honoo」啦。佢哋最近搬咗去金巴利道新店，環境大咗好多，坐得舒服仲多咗升級料理，好似浜燒海鮮、豚五花腩、蘆筍豚肉卷、泡芙等，遲啲仲有露台畀大家唞吓氣𠻹。
而且新店保留原班人馬，靈魂人物健師傅繼續坐鎮，以職人精神「串打ち三年、焼き一生」及入行近20年經驗，繼續延續人手穿串傳統，保證每串串燒都係新鮮，盡見師傅功架。
🌟「火赤Akai Honoo」必食推介🌟
日本九州香草雞串燒
呢度全店選用日本九州香草雞，曾榮獲日本第一個雞(原始)獎「卓越味覺獎1星」㗎。九州香草雞最大特色，係低密度開放式禽舍飼養並用百里香、鼠尾草同迷迭香餵飼，足夠運動量同飼料令肉質特別紮實彈牙，食落仲有淡淡香草味。
每位食客入座仲會免費送6款調味粉(一味粉、咖喱鹽、梅子鹽、芥末、抹茶鹽、七味粉)，每串串燒都可以試吓唔同層次，體驗感幾圓滿。
【激罕提燈 (限定)】 打卡指數📸📸📸📸📸
唔係度度都食到嘅提燈串燒，其實即係母雞輸卵管及未成熟的「流心」雞蛋黃既組成，連埋一齊食雙重口感，蛋黃一入口即刻「噗」一聲爆漿，爆漿口感真係超特別，好值得一試。
【免治雞肉棒 / 雞冠 / 雞銀皮】🍻飲酒必食免治雞肉棒
口感控必食嘅Items—免治雞肉棒、雞冠、雞銀皮！免治雞肉棒加埋蛋漿，咬落去綿滑又爆餡。另外，相信香港人對雞冠、雞銀皮比較陌生，但其實佢哋嘅爽脆咬口，飲埋酒真係世一。
【汁燒雞肝】🤤日本燒鳥店必食
日本燒鳥店真係有好多雞內臟選擇，當中雞肝真係必食！日本人好巧妙用秘製醬汁包裹雞肝，燒到微焦後一咬開就會爆出雞肝甘香味。
【燒明太子】✨居酒屋靈魂定番
近年福岡爆紅，當地名物明太子都一齊大受歡迎！「火赤Akai Honoo」嘅燒明太子燒到半熟，咬開微焦脆外皮即刻爆出微辛又粒粒分明嘅爆珠口感。鹹鮮味極突出，真心要嗌酒邊食邊飲呀🍶。
【白鱔(限定)】🆕新店升級必試
「火赤Akai Honoo」新店廚房大咗，除咗一系列燒鳥，新加嘅海鮮串燒—白鱔 都好令人期待！白鱔串燒最吸引之處，係燒到外皮焦脆、魚肉肥美又有魚油。健師傅嘅職人串燒手藝，絕對呈現到白鱔串燒最吸引之處!! 身為白鱔串燒Fans，真係忍唔住Encore。
【喜之次】🐟海中紅寶石
有「海中紅寶石」之稱嘅喜之次，師傅選擇用鹽燒保留魚肉鮮味，魚皮就燒到金黃香脆，鎖晒魚汁喺入面。一夾開仲係肉眼見到好多魚油㗎，所以魚肉係又嫩又肥美。用最簡單嘅鹽燒方法，令大家食到最原始嘅喜之次風味!!
【玉子燒】🥚居酒屋靈魂
玉子燒完全係居酒屋靈魂，「火赤」嘅玉子燒係做到咬落去軟綿綿又層次分明，同時滲出蛋香同高湯味。甜甜哋好療癒，係大人小朋友都會鍾意食嘅料理。
【汁燒鵪鶉蛋串燒】🍡邪惡爆珠口感
唔好以為鵪鶉蛋無咩驚喜，外層掃上濃郁燒汁再燒到淡淡焦香。咬開有種鵪鶉蛋獨特嘅爆開口感，蛋黃軟軟糯糯，加埋個汁係鹹甜交織，飲埋酒真係好爽!!
火赤 (尖沙咀)
地址: 香港尖沙咀金巴利道40號MW Plaza 3樓
電話: +852 28851688