旺角已經行到熟晒!? 咁你知唔知旺角邊度可以一邊睇星星、一邊飲酒食飯? 原來旺角港鐵站D3出口，行兩步再搭𨋢上12/F就有間隱世天台酒吧「REFLECT」啦。
「REFLECT」戶外空間大到可以包場開Party，好啱睇吓夜景、飲酒食飯。
旺角港鐵站D3出口，5分鐘就去到「REFLECT」，入面係靚西餐環境。
一行入嚟就見到酒吧位同室內座位，再行前啲就有個佔地寬敞嘅戶外天台，大到可以包場開Party或者輕婚禮㗎。天台仲有好多大籐椅，而家天氣涼涼哋，坐喺度望吓旺角夜景、食飯飲酒直落真係幾有Feel。
每晚有駐場調酒師，調製多款打卡雞尾酒。
駐場調酒師定期推出唔同雞尾酒。
呢度主打墨西哥Fusion菜，由10年經驗墨西哥大廚主理，好多地道風味料理—墨西哥餡餅(Quesadilla)、墨西哥烤肉(Fajitas)、墨西哥卷(Burrito) 等，甚至美國人好鍾意嘅墨西哥炸卷(Chimichanga) 都有得食，即刻睇詳情啦～
【墨西哥料理】
墨式粟米片湯 (Tortilla Soup)
前菜可以揀呢道墨西哥湯，酸辣番茄風味幾有記憶點，湯身好濃厚，連埋脆卜卜嘅粟米片一齊食有雙重口感。
墨西哥粟米片配莎莎醬 (Salsa Chips)
講到最熟悉嘅墨西哥菜，一定係粟米片啦！飲住酒慢慢食都Keep到脆。而且包咗3款醬—車打芝士醬、牛油果醬、番茄莎莎醬，一晚Encore兩碟都完全唔悶，佐酒一流。
墨西哥粟米片 (Nachos)
想嚟「REFLECT」飲酒望吓夜景，一定要嗌重醬版本嘅墨西哥粟米片(Nachos)。粟米片焗到又脆又熱，加埋傑克芝士同車打芝士，兩款唔同鹹香嘅芝士撞出層次感。記住每啖都連埋碎牛肉、牛油果蓉同番茄一齊食，絕對上癮。
脆皮玉米餅 (Tacos Party)
相信唔少墨西哥菜Fans 都鍾意食Tacos!! 一於喺「REFLECT」嗌個Tacos Party啦～ 每份Tacos有手掌咁大，啲餡多到就嚟滿瀉，一咬落去係滿滿牛油果醬同莎莎，超級開胃。唔知揀蘑菇、雞肉定牛肉口味嘅話，真心Why not both?
雞肉墨西哥烤肉 (Chicken Fajitas)
想有啲儀式感，好推薦可以自己包捲餅嘅Fajitas。烤肉用鑄鐵鍋熱辣辣上枱，食嗰陣自己拎塊粟米餅，再舀啲烤肉餡、醬汁。想多餡少醬定多餡多醬都得！
雞肉墨西哥卷(Chicken Burrito) & 牛肉墨西哥炸卷(Beef Chimichanga)
身為墨西哥餡餅迷，見到「REFLECT」有齊咁多款餡餅真係好開心！特別係墨西哥捲餅(Burrito) 就有經典版本同炸卷版本，想食軟綿或脆卜卜口感都得！重點係兩款都超級多餡，滿滿嘅肉、濃郁豆蓉、甜椒同拉絲芝士，加埋莎莎醬、牛油果醬同酸忌廉真心豐富，好啱同朋友一齊Share。
墨西哥餡餅 (Quesadilla)
如果你鍾意少啲餡，想專注喺粟米餅皮嘅綿綿口感，可以揀墨西哥餡餅(Quesadilla)。粟米餅皮係用天然粟米整，所以有種獨特穀物香。餡料入面有2款軟綿綿拉絲芝士，餡餅上又淋滿酸忌廉、自家製牛油果醬同莎莎醬。食落有邪惡感，實則勁健康😎。
薄餅 (Seafood Pizza)
召喚各位墨西哥辣椒醬Fans～ 呢款薄餅嘅靈魂，正正係自家製墨西哥辣椒醬！食落辛辣濃郁，配料仲係新鮮八爪魚、蜆肉等，估唔到食到咁重海鮮味嘅薄餅啊。
【甜品】
法式鳥結糖冰糕 (Homemade Nougat Glacé)
呢度有好多手工甜品，會不定期推出朱古力心太軟、手工TiramisuI之外，長駐甜品嘅法式鳥結糖冰糕係必食㗎！呢款甜品製作需時又講究手藝，真係好少餐廳願意花時間焗製。
甜品師傅會先用橙酒Grand Marnier浸泡杏脯、提子乾，再加入烤杏仁片煮成鳥結糖狀態，最後要打勻忌廉蛋白做出綿滑軟糯口感。好鍾意佢哋為香港人度身製作嘅減甜版本，連埋滑膩蜜糖一齊食，甜度啱啱好。
反轉蘋果撻 (Apple Tarte Tatin)
本身「REFLECT」情人節限定嘅反轉蘋果撻，因為反應熱烈而繼續留低，一定要試吓點解咁受歡迎!! 私心覺得個餡真係超多蘋果肉，食落仲好有牛油酥皮香，又脆又香甜爆發幸福感。
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697