拍拖或者閨蜜聚會唔知去邊度Chill好? 想有Feel又有靚景，尖沙咀呢間岩里風餐廳酒吧「KABOOM」絕對係世一之選。呢度樓高兩層，下層係室內岩里風，落地玻璃可以飽覽維港靚景，可以攬住咕𠱸食飯飲酒；上層空中花園鋪滿芬蘭木地板，加埋陽草傘、藤椅真心好有外國酒吧Vibe。
今次試咗佢哋全新嘅A La Carte Menu，完美結合東南亞風味同西式料理，即刻睇吓有咩必食推介啦！
深海墨西哥夾餅 (Deep Sea Tacos)
脆脆粟米餅皮包住彈牙鮮蝦、清爽生菜、酸甜醃洋蔥等，加埋特製泰式醬汁，每啖都好有層次同口感。
自家製蟹肉餅 (House-Made Crab Cake)
對邪惡炸物真係零抗拒力!! 自家製蟹餅外層炸到金黃香脆，切開入面係滿滿嘅鮮甜蟹肉。最癲靈魂醬汁—鹹蛋黃忌廉芝士醬，微辣Romesco醬加埋鹹蛋黃同忌廉芝士Creamy口感，真係有啲上癮，係今晚瞬間清碟嘅菜式之一。
喇沙西班牙海鮮飯 (Laksa Seafood Paella)
點估到傳統西班牙海鮮飯都有變奏版，加入喇沙變成東南亞風味～ 用咗正宗西班牙海鮮燉飯(Paella) 嘅Bomba米，米粒吸滿喇沙湯底，入口係好有椰香同香料味。上面鋪滿挪威海螯蝦、藍青口同魚肉，分量十足好啱一齊share。
泰式雙面金黃脆麵 (Thai Style Double-Sided Golden Crispy Noodle)
有冇諗過泰式x中式Fusion會撞出咩驚喜!? 呢道金黃脆麵就用咗傳統中菜—兩面黃(Liang Mian Huang)，將麵條兩面煎到金黃香脆，再淋上極濃郁嘅Pad Thai蟹汁做到外軟內脆嘅「半脆半軟」口感。加埋火炙藍蝦刺身，多咗陣陣焦香好有記憶點。
冬蔭椰香意大利飯 (Tom Yum Coconut Risotto)
將意大利飯完美融入泰式風味！Risotto吸哂冬蔭功同椰奶精華，比平時主要係忌廉味嘅意大利飯有層次好多。最吸引係好微辣帶甜超級Creamy。配埋鮮甜嘅新鮮海膽，同埋煎到外焦內嫩嘅北海道燒帶子，每啖Risotto都好有海洋風味啊。
沙嗲意大利飯配牛板腱 (Satay Fried Risotto with Oyster Blade Flat Iron Steak)
牛魔王必點～一上枱就見到牛板腱好粉嫩，熟度真係控制得啱啱好。所以肉質依然好粉嫩軟腍，又有牛脂香味。最驚喜係沙嗲醬炒意大利飯，原來意大利飯都可以好似泰菜咁有鑊氣，幾有驚喜。
泰式脆燒肉 (Thai Crispy Pork Belly)
無諗過係咁大件脆脆燒肉，鍾意食肉同脆口嘢嘅話，完全大滿足!! 個脆皮咬落仲係「咔嚓、咔嚓」，中間肥肉通透得嚟亦唔會油膩。側邊係特製泰式辣醬，酸酸辣辣飲酒一流。
南美風醃鰹魚刺身 (Katsuo Ceviche)
其實Ceviche係南美傳統菜，當地人會用青檸汁「醃熟」生魚片。「KABOOM」大廚就嚟個變奏版，用青蘋果莎莎、咬開爆汁嘅柚子珍珠、墨西哥辣椒益力多汁代替經典青檸汁。鰹魚刺身幾軟嫩，加埋個酸甜微辣汁好特別!! 鍾意試新嘢嘅話，絕對必點呀。
火炙吞拿魚 (Tuna Tataki)
相信大家都食唔少火炙吞拿魚，但原來加咗泰式元素係咁醒神。「KABOOM」用咗泰式酸辣汁(Nam jim dressing)、軟滑牛油果醬，個味道已經好有新鮮感。最特別係加咗青提子、海苔麵包糠，天然果甜又香香脆脆咁。
越式烤豬頸肉配自家製雞肉丸清魚湯米線 (Bun Cha with Pork Collar & House-Made Chicken Meatball)
「KABOOM」嘅峇里風戶外座位特別有Feel，好似尖沙咀空中花園咁幾好氣氛。就算簡單食個東南亞經典菜—烤豬頸肉米線，都特別有Feel。而且唔係普通豬頸肉，而係西班牙Duroc豬頸肉燒得幾香口惹味。自家製雞肉丸都彈牙有驚喜，配埋清魚湯、泰國金不換同青檸，真係幾開胃。
KABOOM
地址: 尖沙咀北京道12A號太子集團中心20樓
電話: 37088114