要為約會同聚餐加分，點少得發掘新餐廳，牽起令人興奮又期待嘅心情呢？！開飯仔每個月會搜羅各區特色新餐廳，同大家齊齊緊貼潮流打卡嘆美食，即睇邊間啱你心水～
1月更新
韓式雪花冰主題 Someice
圖：麦麦小宝贝
想發掘雪花冰嘅無限可能性，就要嚟呢間專注於雪氷嘅甜品店喇！店面係行簡約明亮路線，主打嘅韓式雪花冰款式超過10款，冬日限定嘅士多啤梨奶磚氷係嚴選日本進口士多啤梨、獨家手作士多啤梨酸奶磚、每日新鮮現做果醬、麻糬同埋牛奶雪花冰製成，係甜蜜嘅冬日滋味。另一款黃金南瓜麵條氷嘅主要材料，則由每日現打濃密黃金南瓜泥同香濃芝士海鹽奶蓋組成，味道幾清新。如果唔想食冰，可以揀一樣好適合打卡嘅時令水果夾心雞蛋仔、冰藍雪頂椰奶凍或堅持即叫即做嘅鳳凰奶糊米麻糬。
2萬+ Followers人氣蛋糕店 烘桌文化
圖：品牌(IG)
5年來一直努力經營嘅蛋糕網店，終於開門市喇！佢哋每日都會帶唔同嘅大蛋糕同小蛋糕款式現貨到實體店，近期經常現身嘅小蛋糕款式有開心果草莓撻、燉梨檸檬蛋糕同栗子蒙布朗；大蛋糕則有草莓歐牧純生鮮奶油蛋糕、蘋果撻。如果想食到招牌艾菲蘋果撻、冬季限定嘅南涌山檸柑樹蛋糕、人氣栗子提拉米蘇或紅烏龍巴斯克蛋糕，建議先向店家查詢。
可可主題咖啡館×Cocktail Bar Brisa
圖：品牌(IG)
呢間朝啡夕酒主題店，係西班牙餐廳Aire嘅延伸，日間係可可主題咖啡館，一到夜晚就搖身一變成為創意Cocktail Bar。18:00前前大家可以喺度飲到同香港朱古力品牌Conspiracy Chocolate合作推出嘅可可飲品，包括可可鴛鴦/濃縮咖啡、瑪雅香料可可(Xocolatl)，搭配牛角包、沙律，以及朱古力Board、朱古力曲奇、Dark 75%朱古力慕斯Cone等輕食同甜品都咁夾。夜晚度身訂造嘅專屬Cocktails都一樣吸引，你可以自由挑選基酒或無酒精基底，自由搭配各種新鮮食材，最特別係呢度調酒用嘅糖漿、利口酒都係由團隊手工自製，可以話每一杯調酒都係誠意之作！
溫馨西式餐酒館 Mara
圖：由同區人氣咖啡店Brewed團隊主理嘅嘅餐酒館，以色彩鮮艷嘅地中海菜為靈感，全新設計賣相同味道都相當精緻嘅摩登歐洲料理。目前最有人氣嘅菜式係招牌蝦多士、原條八爪魚鬚燉飯同埋甜品Lemon Garden。佢哋另有Lunch Set Menu同Cocktails，鍾意試新餐廳或放工後飲返杯relax一下就唔好錯過喇！
更多OpenRice詳細推介：
► 必試人氣預付套餐優惠 點心放題/帝王蟹自助晚餐/韓式燒肉/法式套餐 (按此)
► BLACKPINK世巡香港站美食攻略 應援甜品/星空酒吧派對/宵夜推介 (按此)
► 錦田打醮2026｜錦田美食嘉年華時間+地點！掃街美食市集/巨型醮棚/神功戲 (按此)
文：Cathy
