近年香港愈嚟愈多甜品店推出斑蘭甜品，由斑蘭蛋糕到斑蘭千層糕等都成為甜品控嘅新寵。淡淡青草香配椰奶甜味，清新又唔膩口。今次整理多間香港斑蘭甜品店，方便一次過比較邊間斑蘭味最濃、邊款最有驚喜。
🌿斑蘭甜品是什麼？
斑蘭(Pandan)其實係東南亞常用香料植物，又叫香斕葉。相比抹茶嘅微苦或朱古力嘅濃郁，斑蘭味道屬於清香型，食落比較輕盈。
1. 觀塘斑蘭甜品：天然斑蘭風味
少見專攻斑蘭甜品嘅小店，斑蘭椰汁千層糕同斑蘭戚風蛋糕部分時段仲可以試食。主打天然斑蘭味道，無加色素同香精。人氣款式一定係斑蘭椰汁千層糕，層層色澤分明，口感煙韌彈牙，椰奶香同斑蘭天然清香結合得幾平衡，甜度唔會太高。另一款受歡迎嘅係斑蘭奶貝，濕潤鬆軟嘅斑蘭蛋糕夾住椰子忌廉，兩種味道都突出但唔互搶，屬奶香同層次感重嘅斑蘭甜品。另有斑蘭女王戚風蛋糕、雲石戚風同椰汁脆卷等選擇，味道口感都比較輕盈。
觀塘斑蘭千層專門店 Pandan Queen Popcornholics
📒 斑蘭甜品筆記
📍 地區：觀塘
🍰 斑蘭款式：斑蘭椰汁千層糕、斑蘭戚風蛋糕、斑蘭奶貝、斑蘭脆卷
💰 價位：約 $30–90
🔥 推介：斑蘭椰汁千層糕、斑蘭奶貝
圖：2. 佐敦斑蘭甜品：款式超多 斑蘭甜品&飲品
呢間咖啡蛋糕店將斑蘭融入唔同甜品、飲品，由斑蘭戚風、卷蛋、麻薯波到斑蘭咖啡飲品都有，真係好罕見。人氣款之一係斑蘭戚風蛋糕，份量大件!! 斑蘭味唔算特別濃烈，口感Fluffy鬆軟、濕潤度高，價錢性價比都好吸引。想試創意款可以揀斑蘭芒果卷或斑蘭紅莓麻薯波，前者有芝士忌廉同果香層次，後者紅莓味配斑蘭幾有新鮮感。飲品方面，斑蘭咖啡係招牌之一，斑蘭香同咖啡苦味Balance得幾好，唔會有人工香精感。
佐敦斑蘭甜品咖啡店 班斕咖啡
📒 斑蘭甜品筆記
📍 地區：佐敦
🍰 斑蘭款式：斑蘭戚風蛋糕、斑蘭卷蛋、斑蘭咖啡、斑蘭麻薯甜品
💰 價位：約 $30–70
🔥 推介：斑蘭戚風蛋糕、斑蘭咖啡
圖：3. 佐敦斑蘭甜品：手工糕點版本斑蘭卷
呢間佐敦街坊店一直以傳統手工糕點見稱，當中椰汁斑蘭卷係唔少人專程回購嘅人氣款，斑蘭卷用薄層方式製作，卷起後層次分明，咬落爽口彈牙，唔會厚實實幾有驚喜。椰汁味突出，加上甜度控制得好，食落清新唔膩口。整體斑蘭味好自然，唔似香精味重嘅版本，凍食口感更煙韌。
街坊人氣斑蘭卷 龍媽媽糕點
📒 斑蘭甜品筆記
📍 地區：佐敦
🍰 斑蘭款式：椰汁斑蘭卷
💰 價位：約 $30–60
🔥 推介：椰汁斑蘭卷
圖：4. 尖沙咀斑蘭甜品：酒店級限定聯乘
嚟自曼谷暹羅廣場、創立於1975年嘅Kanomsiam，被譽為斑蘭甜糕原創品牌。用天然斑蘭葉清香，同埋柔韌嫩滑x薄脆底邊嘅口感對比而聞名。2026年3月16日至29日將快閃香港麗晶酒店港畔餐廳，由團隊即席駐場製作泰式斑蘭甜品，屬期間限定合作。今次帶嚟4款每日新鮮即製甜品。斑蘭脆脆甜糕係獨家首度登場版本，餅皮更薄、底邊更脆，同時調低甜度令斑蘭香氣更加清亮。經典斑蘭甜糕柔韌彈牙、底部薄脆，香味鮮明自然。另外有椰香煎餅不加油烤煎，外層微香、內裡柔軟溫潤；以及甘融煎餅配椰子布丁用斑蘭煎餅包住絲滑椰子布丁餡心，椰香更濃、口感又豐厚啲。
曼谷斑蘭甜糕原創品牌快閃香港 Kanomsiam × 香港麗晶酒店
📒 斑蘭甜品筆記
📍 地點：香港麗晶酒店 港畔餐廳(期間限定)
🍰 斑蘭款式：斑蘭甜糕、斑蘭脆脆甜糕、斑蘭煎餅
📅 日期：2026年3月16日至29日
🔥 推介：即席製作泰式斑蘭甜糕
圖：官方圖片
🍃 香港斑蘭甜品點揀？
| 香港嘅斑蘭甜品其實已經分成幾種風格，如果想揀啱自己口味，可以留意以下幾個方向： 想斑蘭味濃郁、草本香突出👇 可以揀傳統泰式或東南亞路線嘅斑蘭甜糕。甜度一般較低。重點係天然斑蘭葉清香，口感偏煙韌配薄脆底邊，味道層次比較鮮明。 想奶香重、口感輕盈👇 斑蘭戚風蛋糕或奶油卷會較適合。蛋糕鬆軟濕潤，斑蘭味通常調校得柔和啲，適合初次接觸斑蘭甜品嘅人。 想層次分明、有彈牙口感👇 斑蘭椰汁千層糕屬穩陣之選。層層分明、煙韌彈牙，椰奶同斑蘭味平衡得好，係較經典款式。 想試創意版本👇 可以留意加入咖啡、水果或芝士元素嘅斑蘭甜品，味道較現代化，適合打卡或想試新口味。 |
🌿 斑蘭甜品常見問題
| 斑蘭味係咩味？ 斑蘭係天然植物香味，帶淡淡青草同椰香，味道清新唔厚重比抹茶更柔和。 斑蘭甜品通常甜唔甜？ 傳統東南亞版本甜度較低，香港改良版本會偏奶香型，甜度視乎款式而定。 斑蘭蛋糕同斑蘭千層有咩分別？ 斑蘭蛋糕通常口感鬆軟輕盈；斑蘭千層就層次分明、煙韌彈牙，口感再紮實啲。 |
更多OpenRice詳細推介：
► 外賣自取精選優惠 $14川式兩餸粉麵、$41豆腐拼香菇貢丸肉燥飯 (按此)
►【2026米芝蓮】香港及澳門必比登推介 新上榜餐廳指南 (按此)
► 松屋旗下炸豬扒開幕 即睇厚切炸豬扒幾多CM?! (按此)
文：Yanica
攝：Kylie
片：Tony
編：Kate
