餃子絕對係糧尾救星！2026年香港手工餃子選擇愈嚟愈多，由老火魚湯湯餃、爆汁煎餃，到創意口味(如三椒鮮肉、海膽鮮肉、芝士粟米等)，真係各有擁躉。今次整理5間分佈港九新界嘅人氣餃子店，大部分都係街坊熟悉嘅實力型小店。想食零防腐劑健康餃子，抑或拉絲邪惡餃子都有齊，餃子控準備衝啦～
1. 香港手工餃子推介：大大隻CP值超高
呢間街坊餃子小店，一直都有唔少學生同附近居民幫襯，主打手工餃子同麵食。煎餃絕對係重點，餃子底煎到香脆又唔算油膩，幾有滿足感。而且餃身大隻飽滿，餃皮夠薄又有煙韌感。另外水餃款式都幾多，例如帶子韭黃鮮肉餃，內餡飽滿、調味偏清，可以自己加醋油調味。麵食反而有驚喜，蔥油撈麵同京醬雞絲拌拉麵表現唔錯，麵身有嚼口又唔乾，醬汁掛麵效果好，追求實在飽足感就啱喇。
餃子爺爺
📒 開飯仔筆記
📍 地區：觀塘/九龍灣
🥟 類型：手工煎餃/水餃/麵食
💰 人均：約 HK$40–80
🏆 必試：煎餃、帶子韭黃鮮肉餃、京醬雞絲拌拉麵
✅ 小貼士
- 煎餃底部香脆係亮點
- 餃子偏大隻，適合同人分享
- 座位較逼，高峰時段可能要等位
圖：2. 香港手工餃子推介：老字號即包手工餃子
太子呢間餃子小店，多年嚟一直人氣高企。主打人手即日包餃子、唔落防腐劑、餃皮厚薄適中。除咗堂食，亦可以買生餃返屋企自己煎。餃子方面可揀煎或湯：煎餃係煎到金黃香口，外脆內裡仍然保持到肉汁；湯餃餃皮特別滑溜，浸喺湯入面都唔會好快變淋。而且好多餡料選擇，白菜豬肉最經典耐食、韭菜豬肉韭菜味較突出、椰菜雲耳就爽口清新，各有特色。重點係佢哋嘅湯底唔係普通味精湯，而係用野葛菜、生魚同豬骨慢火煲出嚟嘅老火湯，真心暖胃又夠潤，飲完唔會口渴。
美味餃子店 
📒 開飯仔筆記
📍 地區：太子
🥟 類型：手工水餃/煎餃/老火湯
💰 人均：約 HK$40–80
🏆 必試：白菜豬肉餃、煎餃、野葛菜生魚豬骨湯
✅ 小貼士
- 招牌白菜豬肉餃傍晚容易售罄，建議早啲到
- 座位較逼，人齊先入座，不設訂位
- 煎餃表現較突出，外脆內餡飽滿
- 可買生餃回家自煎，店員會教簡單做法
圖：3. 香港手工餃子推介：必食爆漿拉絲 多達十幾款口味
好多元朗街坊都識嘅手工餃子店！每日人手包製餃子，餡料飽滿實在，口味多達十幾款。可湯可煎，仲可以雙拼或三拼，一餐可以試到幾種風味。小店走家庭式路線，特別係湯餃會配花膠淮山豬骨湯，清潤滋補。同場仲有經典韭菜豬肉餃子，味道會濃郁啲；白菜餃子或芹菜餃子就清爽啲。坊間少見嘅京蔥羊肉餃子，蔥香突出亦完全無羶味。芫荽豬肉餃子就加咗沙葛，口感爽脆有記憶點。煎餃係金黃脆卜卜，芝士款一咬會爆漿拉絲，而紫菜豬肉餃子都幾有驚喜。
88手工餃子
📒 開飯仔筆記
📍 地區：元朗
🥟 類型：手工水餃/煎餃/多口味拼配
💰 人均：約 HK$40–80
🏆 必試：韭菜豬肉餃、芫荽豬肉餃、紫菜豬肉煎餃、花膠淮山豬骨湯
✅ 小貼士
- 傍晚易滿座，熱門口味有機會較早售罄
- 可雙拼或三拼，一餐試多款更抵食
- 餃子份量偏大，適合分享
- 愛辣人士可以試吓自家辣菜脯
圖：yuchiro
4. 香港手工餃子推介：番茄薯仔魚湯底
呢度出名用番茄薯仔魚湯，湯底鮮甜有住家感覺！餃子口味選擇多，仲有唔少創意口味。好似香辣榨菜鮮肉餃就辣得開胃，榨菜爽脆有層次。麻香三椒鮮肉餃嘅麻香幾突出，椒味又唔會過火，係幾有記憶點嘅款式。而經典韭菜鮮肉同芫荽胡椒鮮肉都好受歡迎，芫荽味突出兼帶微辣，幾惹味。煎餃方面，推薦粟米芝士鮮肉餃，餃皮煎到金黃脆身，芝士又有拉絲效果！黑松露香菇鮮肉餃煎香後，黑松露香味更濃郁啊。
逸東餃子
📒 開飯仔筆記
📍 地區：北角
🥟 類型：魚湯餃子/創意口味煎餃
💰 人均：約 HK$50–90
🏆 必試：番茄魚湯餃、麻香三椒鮮肉餃、粟米芝士鮮肉煎餃、黑松露香菇鮮肉餃
✅ 小貼士
- 魚湯屬亮點之一，想清爽可揀湯餃
- 煎餃香氣會更突出，創意口味較有驚喜
- 口味選擇多，適合多人share試幾款
圖：chloe27
5. 香港手工餃子推介：超多款爆餡餃子
元朗教育路人氣小店，走住家實力路線，平日午市都幾旺場。主打手工水餃，款式選擇好多。唔知點揀仲有「全家福水餃」一次過試勻多款餡料，好啱選擇困難人士。餃子整體足料，餡料紮實有肉汁，唔會太重口味。招牌海膽鮮肉餃鮮味突出，揀煎餃嘅話會更香口。另外，爆汁牛肉餃肉汁豐富、韭菜豬肉鮮蝦餃口味就夠晒經典。湯底方面可揀野生菌螺肉雞湯，清甜養生，飲落唔會口渴。澱粉控可以加配玉米麵，口感彈牙有嚼勁。
半斤餃子
📒 開飯仔筆記
📍 地區：元朗
🥟 類型：手工水餃/創意餡料/養生湯底
💰 人均：約 HK$50–100
🏆 必試：全家福水餃、海膽鮮肉餃、爆汁牛肉餃、野生菌螺肉雞湯
✅ 小貼士
- 午市人氣高，雙拼或全家福適合試多款
- 湯底清甜養生，唔屬重味精路線
- 餃子份量足，口味偏實在耐食型
圖：🥟香港手工餃子點揀？3個簡單判斷方向
想食高質餃子，其實可以留意3個重點：
① 餃皮厚薄：薄皮較容易帶出肉汁爆發感，厚皮就口感煙韌啲但容易蓋過餡料
② 湯底類型：魚湯、老火湯天然鮮甜/ 清湯會比較清淡/ 亦有個別店舖走重口味風格
③ 餡料比例：肉比例高通常較爆汁，蔬菜比例高就口感爽口啲
更多OpenRice詳細推介：
► 春日美食祭套餐優惠 任食意粉/日式盛宴/燒肉/粵式海鮮 (按此)
► 凌晨宵夜地圖｜香港半夜食咩好? 旺角串燒/和牛放題/打冷/24小時茶餐廳(持續更新) (按此)
► 2026生日優惠餐飲精選 送多款免費餐點 (持續更新！) (按此)
文：Yanica
編：Kate
