仲頭痕緊情人節食咩好嘅，不如睇吓以下呢幾間精選嘅情人節餐廳，想同伴侶Sweet吓、打卡放閃就啱晒啦～
法式浪漫食生蠔•魚子醬 Jean‑Pierre
想情人節有儀式感～呢間餐廳氣氛好似去咗法國啲小酒館咁，十道菜盛宴由招牌雞尾酒開場，輕酌浪漫吓。到咗前菜就有多款經典：魚子醬法式魔鬼蛋、法國生蠔配紅醋汁、羊奶芝士沙律同手切牛扒他他，又魚子醬又生蠔真係好吸引！主菜方面，開飯仔推介干邑火焰黑椒牛扒，用澳洲Stanbroke牛柳，所以牛味好濃幾Surprise！甜品就有千層酥配雲呢拿忌廉覆盆子醬 或 60%黑朱古力海鹽慕絲，跟住女朋友/老婆口味嚟揀就實無問題啦。
供應日期：2月14日
價錢：每位HK$1,088
歷史悠久意大利餐廳 La Taverna 
帶伴侶去充滿歷史感嘅意大利餐廳食飯，更加顯得你有花心思Plan情人節！呢度於1969年開業，被視為香港歷史最悠久意大利餐廳之一。保留原裝意大利家俱，好似走入傳統意式小餐館咁，溫馨又有故事。情人節限定菜單有幾道菜都好吸睛，如玫瑰紅菜頭燴飯配哥根佐拉芝士，係女仔都會鍾意嘅粉紅色。而招牌大西洋黑鱈魚配黑蒜同覆盆子醬，微酸風味幾特別。甜品嘅蘋果生朱古力擺盤好吸引，仲送一杯普羅塞克粉紅氣泡酒，即刻加分～
供應日期：2月14至15日
價錢：每位HK$788
尖沙咀酒店海景牛扒西餐 Morton’s The Steakhouse
講到情人節大餐，鋸扒一定係人氣之選！呢間酒店餐廳可以望住維港景鋸扒，呢個三道菜情人節套餐有齊前菜、主菜同甜品，每位再送一杯香檳、葡萄酒或者情人節限定雞尾酒～打頭陣有龍蝦湯、香煎鵝肝配蘋果醬、海鮮拼盤(兩位用)等選擇，至於主菜推介肉味濃郁嘅帶骨西冷牛扒(28oz｜兩位用)，又或者軟嫩富油香嘅肉眼牛扒、烤羊扒，啱晒無肉不歡嘅另一半。鍾意海鮮亦可以揀焗原隻波士頓龍蝦，或者法式帶子配龍蝦魚子醬。最後甜品有白朱古力紅莓芝士餅，夠晒甜甜蜜蜜～
供應日期：2月6日至2月15日
價錢：每位HK$1,788
尖沙咀海景食中菜 胡同
唔想年年情人節都食西餐～呢間中菜就可以一邊睇維港夜景一邊食飯，氣氛一樣咁浪漫～限定供應六道菜情人節晚宴，前菜有話梅淮山同藤椒花枝，酸甜同麻香交錯好開胃。呢個時候仲會送上迎賓氣泡酒（唔飲酒嘅話可揀特色mocktail紅線，用薑汁汽水加鮮紅莓、蔓越莓同柑橘調出清爽果香）。主菜亮點係酥脆A5和牛面頰，用醬油翻炒帶鹹甜焦香，肉質嫩得嚟好惹味；另一款走精緻路線嘅桂花雞油星斑，就有淡淡花香好加分。而且中菜甜品一樣浪漫，係甜心相印配酸櫻桃醬、蛋白餅同烤雲呢拿忌廉，有心思得嚟又唔會太甜～
供應日期：2月14日
價錢：每位HK$1,280
日韓美Fusion解決選擇困難 Akira Back
唔知揀日本菜、韓國菜定西餐？呢間餐廳就滿足晒所有要求，混合日式細膩、韓式熱情同美式創意，推出限定情人節盛宴！冷盤韓式辣醬拌生魚片集合赤身、鯛魚、牡丹蝦同三文魚，配埋紫蘇籽香味同柚子醋汁好有層次。之後仲有象拔蚌薄切刺身配海膽、魚子醬同黑松露醬，鮮甜又有驚喜。今次亦有鹽麴熟成紅鯔魚，配埋濃郁蝦油、青口、墨魚等，真心勁有鮮味。主角 Surf & Turf 拼盤份量十足，A3和牛西冷、煙燻味噌醬黑豚肩肉同蒜蓉牛油虎蝦一齊上。份量咁多，真係要配埋韓式生泡菜解吓膩先食得晒。
供應日期：2月14日
價錢：兩位HK$2,888（已包兩杯玫瑰氣泡酒）
米芝蓮一星浪漫邂逅 Arcane
神神秘秘帶另一半去米芝蓮一星餐廳，肯定畀到驚喜。呢度由名廚Shane Osborn團隊設計嘅情人節餐單，一開場帝王蟹撻已經好搶眼，鮮甜蟹肉配牛油果、爽脆蘋果、細蔥、黑松露，味道細膩又有層次。而北海道帶子刺身就用椰菜花蓉同柑橘醬汁襯托奧西特拉鱘魚子醬嘅鹹鮮，優雅又醒胃。熱葷有炒意式薯糰，外層會裹上紹興濃湯汁，配埋羊肚菌同黑松露一齊食幾有新鮮感。主菜澳洲和牛臀蓋肉好有油香，配四季豆同香芋千層酥中和膩感啱啱好。甜品嘅食材好特別，烤士多啤梨紅菜頭撻配洛神花雪葩收尾，係平時好少食到嘅味道配搭。
供應日期：2月14日
價錢：每位HK$1,688；餐酒配搭三杯HK$588 / 五杯HK$888
星級廚主理澳洲風餐館 Servo
呢間中環餐館由星級主廚Shane Osborn主理，悠閒風Style好啱情侶拍拖Chill～新出嘅分享式晚市套餐方便大家一次過試勻多款菜式，餐前小食包括煙燻鱒魚多士、牛肉他他、日本雞胸肉凱撒沙律同一「杯」湯配烤意式香草麵包，主菜方面可以揀澳洲和牛牛腩漢堡、芝士火鍋配意式火腿、香煎豚肉肉丸、自家製雞肉蘑菇大蔥批(二人份)，而素食人士就可以試自家製素漢堡配牛油果及辛辣墨西哥辣椒醬。套餐仲包埋甜品，真係好豐富～
價錢：每位HK$348
【$$大作戰💰葵廣$111一個人過情人節】
文：Yanica、Kylie
攝：Renee
片：Yan Yan
編：Kate
