平時喺官也街行到攰，想搵個地方舒舒服服食餐飯，轉入去後巷發現呢間葡富軒。
裝修帶點葡國風，比起傳統老店多咗份空間感，坐得幾自在，唔會好似出面啲遊客店咁趕，有氛圍感👍👍
試咗幾樣招牌，最驚喜係個焗釀蟹蓋🦀🦀，入面釀滿晒蟹肉，真材實料。表面焗到金黃微焦，食落啖啖肉，蟹味鮮甜得嚟唔會被忌廉搶咗鏡，調味啱啱好。
招牌乳豬🐷亦好出色，塊皮烤到鬆化香脆，皮下脂肪化開咗，啲油香滲晒入去嫩滑嘅肉質入面，食落去油潤得嚟又唔會覺得膩，火候控制得相當準。
再加埋外層乾身嘅馬介休球，入面魚絲份量夠，鹹鹹香香幾惹味，外脆內軟，食葡國菜必點👍
呢度嘅出品感覺得出廚師好有心機，每道菜都做到平衡。
