講起澳門新馬路福隆新街，通常都係諗到懷舊同傳統美食，但今次同朋友嚟到 Naughty Nuris，就係想試下佢哋搞邊科。一入去已經感受到嗰種活潑嘅氣氛，由葡國人主理嘅印尼Fusion菜，聽落已經覺得好有趣。
我哋今次叫咗Lunch Set Menu，兩個人份量啱啱好。先嚟嘅 招牌豬肋排 真係冇得輸，肉質嫩滑，輕輕一咬就已經骨肉分離，表面嘅燒烤醬甜香惹味，帶少少焦香，係我心目中嘅全場MVP。
沙嗲雙拼串燒（豬及雞） 都好有誠意，沙嗲醬濃郁帶花生香，肉串燒得微焦，Juicy唔乾身。
朋友最期待嘅 澳門馳名豬扒包 果然冇令人失望，豬扒夠薄夠入味，麵包外脆內軟，簡單但經典。
而 鮮蝦哈哈籽意粉 就係驚喜之作，蝦籽鹹香掛晒喺每條意粉上面，配合爽口鮮蝦，口感層次豐富。
小食方面，海鹽燒菠蘿 係完美嘅中場休息，海鹽帶出菠蘿嘅天然甜味，清新解膩。我嗌咗杯 斑斕梳打水，顏色已經夠IG-able，味道清涼帶斑斕香，同濃味嘅菜式好夾。
總括來講，呢度嘅食物有創意之餘唔會標奇立異，食得出用心。五個字食評：惹味又過癮！
如果鍾意試新派 Fusion 菜，又鍾意有氣氛嘅地方，呢間值得一試。
