去澳門搵食，最怕中伏食啲港式葡國菜，今次搵到位於氹仔嘅 Amalia 葡悅，由正宗葡國人主理，果然係兩個世界！
前菜先上 葡式經典馬介休球，外層炸得金黃酥脆，一切開絲絲鹹香魚肉混住綿滑薯蓉，調味恰到好處，完全唔會死鹹，不愧係招牌。跟住有 灸燒葡式香腸，店員推車仔到面前點火即燒，成條腸喺火焰中滋滋作響，視覺效果滿分之餘，食落帶焦香嘅腸衣包住Juicy肉餡，配埋麵包一齊食，忍唔住叫多杯紅酒！
蒜蓉大西洋虎蝦配特級初榨橄欖油 係另一個亮點，蝦肉爽彈鮮甜，蒜蓉橄欖油汁香濃得嚟唔會蓋過蝦味，用麵包蘸汁食到舔舔脷。緊接嘅 葡式烤沙甸魚 配馬鈴薯及燈籠椒，沙甸魚燒到外皮微焦，魚肉油潤甘香，簡簡單單但充滿家鄉風味。
壓軸係 葡式燒伊比利亞黑毛豬肋骨，黑毛豬本身肉味已經夠濃，經慢烤後肉質軟嫩到輕輕一撕就離骨，表面塗上秘製燒烤醬，甜中帶鹹，食完要舔手指！
呢餐由前菜到主菜，每一道都食得出葡國人對家鄉味道嘅執著。下次嚟澳門想食正宗葡菜，Amalia 絕對要列入你的必食清單！
