。
顧名思義，中菜廳設於酒店一樓，前身嘅「駿景軒」就縮咗一半剩返二樓一層。間隔其實同之前差唔多，大堂有多張大小圓枱散座，光猛開揚。
另設有三間私人廂房，其中左右兩間可容納上十二人。
房間門外有對意頭好好嘅對聯
。
十人派對被安排入座中間最大嗰間房，正常可以擺兩圍，有電視睇，闊落舒適。
餐桌上舖有枱布，每位席上亦有齊備嘅自用及公用餐具，厚厚嘅餐巾尤其高雅。
XO仔訂位時好醒目地攞定電子餐牌方便訂餸，好等新廚房有預算。厚本餐牌共有十一頁之多，最後一頁清楚列出各小項之收費詳情，包括茶錢$20/位、小食$40/份、開瓶費$300/枝等。
迎賓小食（$40/份）：人未到齊先有香脆易入口嘅白飯魚小食。
椒鹽田雞腿（$208/份）：起餸好有文化地先上前菜。新鮮炸出嘅椒鹽田雞腿肉質細嫩，熱辣惹味。
家鄉煎釀尖椒：意外地尖椒一啲都唔辣，外層嘅椒皮外脆內軟，蝦膠餡心鮮爽彈牙
，送酒一流！
乾蔥煎排骨（$208/份）：半肥瘦嘅排骨仔鬆爽入味，食落毫不油膩，簡單香口。
廿年陳皮順德拆骨魚雲羹（$88/位；兩位起）：招牌魚雲羹鮮甜綿滑，當中嘅魚雲好比豆腐般細嫩滑溜，混入咗粉絲、雲耳絲、豆腐等，直令口感更為豐沛，必吃推介也
！
生拆蟹肉桂花炒魚翅（$1,180/份）：金黃亮麗嘅桂花翅炒得好夠乾身，當中大大粒蟹肉幼嫩白滑，撈入咗芽菜、蛋蛋都冇話出哂水，極之清爽，不過如果蟹肉份量可以多啲就更加完美啦！（請留意，相中份量為份半，建議十個壯漢最少要叫兩份
。）
苦瓜支竹炆斑翅（$880/份）：怕骨嘅小肥冇試到，只聽見一眾魚王魚后欣賞煲上嘅斑翅厚肉鮮濃，而且夠哂熱辣辣，就連配角嘅苦瓜、支竹同冬菇都話咁快清哂，應該堅入味。
大良銅盆煎焗魚咀（$228/份）：正當數字auntie嫌碟餸嘅擺盤唔夠精美時，大肥爸爸已經讚緊啲魚咀焦香酥脆夠乾身，而且內藏勁多豐腴鮮美嘅魚雲
，明顯更著重內涵。
黃沙豬潤牛肉煲（$238/例）：煲中嘅牛肉柔韌潤滑鑊氣足，部份黃沙潤其實真係爽厚粉嫩
，絕不乾嚡，只係十人叫咗份半唔夠皮（估計一客例牌頂盡食五至六人），所以蕃薯Uncle食咗件細薄嘅豬潤先會話啲黃沙潤唔夠厚。
大地魚炒菜心（$168/例）：翠綠嘅菜心爽脆冇渣。
馳名脆皮黃油雞（$580/隻）：真如餸名般脆皮嘅黃油雞肉質細嫩中散發出陣陣雞油香，能達到皮肉分離嘅境界但又唔見有皮下脂肪，效果高雅健康。
豉汁排骨陳村粉（$238/例）：舖面嘅排骨口感帶爽，墊底嘅陳村粉白滑軟薄，唯一個人覺得調味偏咸咗少少。
欖仁馬拉糕（$68/份）：造到好似蛋糕仔嘅馬拉糕菂菂薂薂，鬆身軟綿，微甜芳香，一口一件極之輕盈。
芝麻炸湯丸（$68/份）：流心嘅炸湯丸皮層煙韌軟糯，芝麻餡心濃甜不溜滯。
酒店中菜「粵一樓」環境衛生企理，傳統功夫粵菜質高味佳，價格合理，絕對值得一試
！只係試業期間仍有不少甩漏之處，生手嘅服務生總算態度友善誠懇，相信遲啲熟習後各方面都會有所提升。
