銅鑼灣新開嘅型格「麻甩系」餐廳，以一系列雞肉料理帶嚟集視覺驚喜、味覺享受同玩味元素嘅餐飲地標。店內特設乾式熟成櫃，以自家熟成雞隻炮製招牌燒熟成三黃雞！另外仲融入日韓風味，令味道更多變化～即睇開飯仔試食筆記攞靈感啦！
招牌主菜燒熟成三黃雞
💰 定價：HK$248/半隻
🔥 試食筆記：將店內自家熟成三黃雞吊掛熟成後再高溫烤製，外皮金黃酥脆唔多脂肪，咬落肉嫩多汁。想惹味啲可以蘸日式甜醬油，鍾意刺激啲就有自家製蝦辣醬，落少少已經有辣勁！
雞油脆飯
💰 定價：$58/份
🔥 試食筆記：米飯混合粟米粒、漬物同焦香大蔥，再用雞油煎脆，有少少似煲仔飯嘅飯焦，入口唔覺得油膩，食晒都冇咩罪惡感。
「雞哥」招牌雞肝醬
💰 定價：$78/份
🔥 試食筆記：風味濃厚嘅雞肝醬，加入味噌蜜糖調和之外，面層再放上甜蜜嘅無花果醬，配搭新穎。用撒滿脆雞皮碎同芝士嘅香脆薄切多士蘸醬，入口鹹鹹甜甜，如果多幾條多士，分量分配會更加好。
燒酎人參雞湯
💰 定價：$78/份
🔥 試食筆記：中日Fusion口味～人參味好濃厚，似媽咪煲湯咁足料！另外附上日本米燒酎畀大家按喜好添加，開飯仔試加咗少少已經令味道昇華，有驅寒暖胃嘅感覺𠻹。
鑊氣雞腎
💰 定價：$88/份
🔥 試食筆記：靈感嚟自韓式菜包肉，店員介紹可以用菜裝住雞腎一齊食～雞腎用雞油爆炒，再加入韓式辣醬、番茄同青椒翻炒，口感爽脆，甜辣香口，幾啱做下酒菜。
雞紅三寶
💰 定價：$68/份
🔥 試食筆記：呢道菜係街頭風味變奏版！雞紅同蘿蔔煮得香辣入味，仲有釀入少少布里芝士嘅福袋，全部都盡吸湯汁精華～
「三酒」醉炸乳鴿
💰 定價：$158/份
🔥 試食筆記：乳鴿用桂花陳酒、紹興酒同玫瑰露酒醃製3日，然後風乾1日再油炸，入味得嚟鹹度適中，趁熱食仲有啖啖肉汁。搭配嘅脆片幾厚實，而且意外地有啲似魚蛋味，出色！
烤時蔬配腰果味噌醬
💰 定價：$88/份
🔥 試食筆記：呢份時蔬係西日Fusion滋味，皆因配腰果味噌醬之外，仲有西餐常見嘅青醬～時蔬烤得軟熟，唔同風味嘅醬料都融合得幾Balance，加埋酥脆炸黃豆，口感更加豐富。
雞記飯店 
地址: 香港銅鑼灣軒尼詩道500號希慎廣場8樓誠品804號舖
文、相：Cathy
