半夜肚餓、夜收工、唱K散場食咩好? 香港其實仲有唔少宵夜選擇㗎。本系列每月更新唔同地區凌晨營業食肆，由通宵茶餐廳、深夜拉麵到24小時餐廳，逐區整理最新開飯清單！今個月整理旺角區凌晨營業食肆，方便你即時搵到半夜仲開門嘅地方。
1. 旺角宵夜推介：開到凌晨串燒店
呢間算係夜鬼穩定之選。環境簡單舒服，適合兩個人慢慢食慢慢傾偈。串燒款式多，由基本雞翼、雞軟骨、牛丸，到西班牙黑毛豬肋串、鹽燒大頭蝦、蒜蓉燒蠔都有，海鮮比例幾高。串燒火候控制穩定，上枱嗰陣仲係熱辣辣有炭香。私心推薦鹽燒大頭蝦幾新鮮彈牙，咬落會有爆膏感。另外好多人嗌嘅仲有安格斯牛肋串，肉質幾軟嫩。雞皮屬隱藏款，燒得乾身脆口。想食飽啲亦可以揀龍蝦汁大蝦意粉或鮑魚汁海鮮荷葉飯，好少見串燒店都有得食。飲品方面有好多款啤酒，想解膩亦可以揀鹹檸七，夜晚可以chill吓飲住傾。
好燒式串燒專門店
📒 開飯仔筆記
🍢 串燒/燒海鮮/港式小炒
🕒 宵夜時段：營業至凌晨3點
👥 適合情侶約會/朋友宵夜聚會
🔥 推介：牛油金菇包、鹽燒大頭蝦、蒜蓉燒扇貝、安格斯牛肋串
圖：張寶妮
2. 旺角宵夜推介：潮州打冷 大件夾抵食
主打潮式滷水同打冷菜式，選擇多到海鮮、滷味、煲仔、小炒都有。砵酒焗鱔球火候掌握得好，鱔肉嫩滑、醬汁濃郁入味，屬送飯型菜式。荔枝骨酸甜有果香，比一般生炒排骨清爽少少。花蛤煲、豉椒炒花甲都屬性價比之選，花蛤新鮮清甜，炒得有鑊氣。滷味系列就有招牌滷水鵝同滷水豬手，滷水味夠濃好啱配啤酒。想暖胃可以試鹹菜豬肚湯，湯頭唔係重胡椒路線，飲落反而清潤順喉。整體屬「大件夾抵食」路線，宵夜時段想食熱辣辣中菜就啱晒喇～
明記潮館 
📒 開飯仔筆記
🥘 潮州菜/打冷小炒/滷水
🕒 宵夜時段：營業至凌晨3點半
👥 適合朋友聚會/慢慢食飯吹水
🔥 推介：砵酒焗鱔球、荔枝骨、鹹菜豬肚湯、滷水鵝、煎蠔烙
3. 旺角宵夜推介：深夜居酒屋 串燒/炸物/石鍋飯
呢度主打串燒同炸物，仲有啤酒時段優惠，適合夜收工後坐低飲兩杯。店內氣氛輕鬆，牆身貼滿日本動畫海報同櫻花裝飾，幾有日式小店感覺。串燒選擇多，燒牛舌、豚肉露筍卷、雞翼、雞軟骨火候控制得唔錯。串燒之外，燒椰菜都好清甜，即叫即炸吉列廣島蠔又外脆內嫩，同埋清酒煮蜆都好鮮甜。想食飽啲可以揀石鍋和牛飯，有飯焦口感；蟹肉海膽炒飯就麻油香明顯，飯粒分明。冷烏冬、沙律、小食配搭都齊全，夜晚想食串燒定主食都滿足到。
深宵食堂
📒 開飯仔筆記
🍶 日式居酒屋/串燒/炸物
🕒 宵夜時段：營業至凌晨2點
👥 適合朋友聚會/夜收工小酌
🔥 推介：燒牛舌、吉列廣島蠔、石鍋和牛飯、清酒煮蜆
4. 旺角宵夜推介：牛魔王之選 和牛打邊爐放題
夜晚想瘋狂食牛，呢間樓上火鍋店主打和牛放題幾有吸引力。2小時任食模式，一坐低打頭陣有8款牛肉拼盤，包括澳洲M7和牛、封門柳、牛板腱、安格斯牛肩胛、和牛金錢𦟌、牛脷片等，滿足晒對牛肉追求嘅油花、肉感同牛味。湯底選擇夠多，由番茄羅宋湯、肉骨茶、沙嗲湯，到重慶綠辣椒鍋、豬骨粟米湯都有。自助區配料齊全，蔬菜、丸類、餃子、鵝腸、手唧蝦滑、響鈴、炸魚皮同多款麵類任拎，飲品同甜品都有，宵夜咁豐富真係好好！
天下糧倉牛肉火鍋專門店
📒 開飯仔筆記
🥩 牛肉火鍋放題/和牛任食
🕒 宵夜時段：晚市營業至凌晨4點
👥 適合牛肉控聚餐/多人開餐
🔥 重點：澳洲M7和牛拼盤、鴛鴦湯底、自助配料區
圖：高夫人
5. 旺角宵夜推介：24小時港式茶餐廳
旺角有間24小時營業嘅茶餐廳，無論早餐、晚飯定凌晨醫肚都無問題。霓虹燈裝修幾有港式懷舊感，空間比一般茶記闊落，高峰時段都未必一定要搭枱。常餐選擇多，沙嗲牛肉麵係人氣之選，湯底花生味濃郁，唔係死鹹路線；牛乳炒蛋濕潤有蛋香；奶油豬趁熱食真心脆。晚市有鹽焗雞半隻配飯套餐、焗豬扒飯、焗牛筋牛肋條飯都係大件夾抵食類型。飲品方面用黑白奶沖奶茶，亦有即磨咖啡。基本上由早餐常餐到晚市小炒都有，宵夜時段仲有特別套餐。
華仔冰室
📒 開飯仔筆記
🍽 港式茶餐廳/常餐/焗飯
🕒 24小時營業(設宵夜套餐)
👥 適合凌晨醫肚/朋友聚腳/帶外地朋友體驗港式味道
🔥 推介方向：沙嗲牛肉麵、鹽焗雞半隻飯、焗豬扒飯、牛乳炒蛋常餐
🕒 凌晨旺角食咩好？
10PM–12AM
想慢慢食、傾偈飲兩杯，可以揀串燒或潮州小炒，氣氛輕鬆又唔趕時間。
12AM–2AM
夜收工或朋友聚會，可以考慮居酒屋或火鍋放題，選擇多又坐得耐。
2AM–5AM
呢個時段選擇會少啲，24小時茶餐廳最穩陣，想食麵、飯或常餐都冇問題。
🌙 旺角凌晨揀餐廳懶人包
想飲酒chill吓👉 串燒/居酒屋
想大啖食肉👉 和牛火鍋放題
想熱辣辣食飯👉 潮州小炒
想穩陣👉 24小時茶餐廳
想食平啲簡單醫肚👉 常餐或麵類套餐
更多OpenRice詳細推介：
► 春日美食祭套餐優惠 任食意粉/日式盛宴/燒肉/粵式海鮮 (按此)
► 2026抵食手工餃子地圖: 老火魚湯餃vs拉絲邪惡餃都有 5間分佈港九新界 (按此)
► 2026生日優惠餐飲精選 送多款免費餐點 (持續更新！) (按此)
文：Yanica
編：Kate
